تیری نظروں کا فسوں، دشمنِ دیں ہے ساقی​

تیری نظروں کا فسوں، دشمنِ دیں ہے ساقی​

ورنہ پینے میں کوئی بات نہیں ہے ساقی​

​

جو ترے جام سے سرشار نہیں ہے ساقی​

وہ بشر کون سی بستی کا مکیں ہے ساقی​

​

اس مئے ناب سے کیا فائدہ، جب ساغر میں​

جلوہ افروز تری چینِ جبیں ہے ساقی​

​

ابھی باقی ہے الَم ہائے فراواں کا خمار​

ابھی ہلکی سی کسک دل کے قریں ہے ساقی​

​

نظر اٹھتی ہی نہیں ہے ترے میخانے سے​

ورنہ دنیا کی ہر اِک چیز حسیں ہے ساقی​

​

بچ کے جائیں گے کہاں عالمِ بالا کے مکیں​

آسماں بھی ترے کوچے کی زمیں ہے ساقی​

​

آنکھ نے کھائے ہیں سو بار نظر کے دھوکے​

دل بدستور محبت کا امیں ہے ساقی​

​

فقط آنسو ہی نہیں حسنِ وفا کا زیور​

یہ تبسّم بھی محبت کا نگیں ہے ساقی​

​

(صوفی تبسّم)​