یہ کس دیارِ عدم میں ۔ ۔ ۔​

یہ کس دیارِ عدم میں ۔ ۔ ۔​

​

نہیں ہے یوں تو نہیں ہے کہ اب نہیں پیدا​

کسی کے حسن میں شمشیرِ آفتاب کا حسن​

نگاہ جس سے ملاؤ تو آنکھ دکھنے لگے​

کسی ادا میں ادائے خرامِ بادِ صبا​

جسے خیال میں لاؤ تو دل سلگنے لگے​

نہیں ہے یوں تو نہیں ہے کہ اب نہیں باقی​

جہاں میں بزمِ گہِ حسن و عشق کا میلا​

بنائے لطف و محبت، رواجِ مہر و وفا​

یہ کس دیارِ عدم میں مقیم ہیں ہم تم​

جہاں پہ مژدۂ دیدارِ حسنِ یار تو کیا​

نویدِ آمدِ روزِ جزا نہیں آتی​

یہ کس خمار کدے میں ندیم ہیں ہم تم​

جہاں پہ شورشِ رندانِ میگسار تو کیا​

شکستِ شیشۂ دل کی صدا نہیں آتی​

(ناتمام)​