آنکھ اوجھل پہاڑ اوجھل ہے​

دہر بھی میرؔ طُرفہ مقتل ہے​

جو ہے سو کوئی دم کو فیصل ہے​

​

کثرتِ غم سے دل لگا رُکنے​

حضرتِ دل میں آج دنگل ہے​

​

روز کہتے ہیں چلنے کو خوباں​

لیکن اب تک تو روزِ اوّل ہے​

​

چھوڑ مت نقدِ وقت نسیہ پر​

آج جو کچھ ہے سو کہاں کل ہے​

​

بند ہو تجھ سے یہ کھلا نہ کبھو​

دل ہے یا خانۂ مقفل ہے​

​

سینہ چاکی بھی کام رکھتی ہے​

یہی کر جب تلک معطل ہے​

​

اب کے ہاتھوں میں شوق کے تیرے​

دامنِ بادیہ کا آنچل ہے​

​

ٹک گریباں میں سر کو ڈال کے دیکھ​

دل بھی کیا لق و دق جنگل ہے​

​

ہجر باعث ہے بد گمانی کا​

غیرتِ عشقِ ہے تو کب کل ہے​

​

مر گیا کوہکن اسی غم میں​

آنکھ اوجھل پہاڑ اوجھل ہے​

میر تقی میرؔ​