تسکِیں کو ہم نہ روئیں جو ذوقِ نظر مِلے​

غزلِ​

اسد الله خاں غالب ​

​

تسکِیں کو ہم نہ روئیں جو ذوقِ نظر مِلے​

حُورانِ خلد میں تری صورت مگر مِلے​

​

اپنی گلی میں مجھ کو نہ کر دفن بعدِ قتل​

میرے پتے سے خلق کو کیوں تیرا گھر مِلے​

​

تجھ سے تو کچھ کلام نہیں، لیکن اے ندیم​

میرا سلام کہیو اگر نامہ بر مِلے​

​

تم کو بھی ہم دِکھائیں، کہ مجنوں نے کیا کِیا​

فرصت کشاکشِ غمِ پنہاں سے گر مِلے​

​

لازم نہیں کہ خضر کی ہم پیروی کریں​

مانا کہ اک بزرگ ہمیں ہم سفر مِلے​

​

ساقی گری کی شرم کرو آج ورنہ ہم​

ہر شب پیا ہی کرتے ہیں مے جس قدر مِلے​

​

اے ساکنانِ کوچۂ دِلدار دیکھنا​

تم کو کہیں جو غالبِ آشفتہ سر مِلے​

​