سارباناں مہرباناں راہیا،

کن فیکون تے کل دی گل ایں اساں اگے پریت لگائی
تو میں حرف نشاں نہ آں ہا جدوں دتی میم گواہی

اجے وی سانوں آپے دسدے بیلے بوٹے کاہی
مہر علی شاہ رل تائیوں بیٹھے جداں سک دونہاں نوں آئی

سارباناں مہرباناں راہیا،
شالاجیویں خیر تھیویں ماہیا
آکھیں جا اوہنا پیاریا ، دل جانیاں
گوڑھے نیناں والیا مستانیاں
بن تساں ہک گھڑی سو سال دی
بہہ ٹھکانے پئی تساں ڈے حال دی
بالدی ڈیوے پئی خانقاہ تے
آوندا ویکھاں دھول انہاں راہ تے
سارا عالم صدقے آکھاں بول تے
جان واراں اس انوکھڑے ڈھول تے
پوہنچے جد توں سوہنیاں دی جھوک تے
خیر ہو وی اوہناں نوں ذرا روک تے
اک وچھوڑا دوجے طعنے جگ دے
پیراں تھیں سر تک المے اگ دے

 کلام : پیر سید مہر علی شاہ رحمتہ الله علیہ