نیا سال آیا ھے

نیا سال آیا ھے
ویران صبحوں کی نیلی تہوں سے ابھرتا
خیابان و دشت جبل کی ٹھٹھرتی خاموشی میں برفیلی سیٹی بجاتا
دبے پاوں آیا
یخ آلود شاموں کی خاموشیاں
اس کے قدموں کی آہٹ سمیٹے
گزرگاھوں پر, سائے بانوں میں نوحہ کناں ھیں
در آتی ھے شب کے دریچوں کی درزوں سے
پرشوک جھونکوں کی بے مہار ٹھنڈک
برودت زدہ پانیوں پر پرندے
کناروں پہ آستادہ پیڑوں کی نمناک شاخوں کی جانب اڑے جا رھے ھیں
مکین آنگنوں میں, چھتوں پر
دھڑکتے دلوں میں ہزاروں خیالوں کی شمعیں جلائے
آتے ھوئے سال کو دیکھتے ھیں

(شاعر: منیر نیازی)